Billi/Brynjar Gunnarsson

Talsmaður samtakanna No Borders Reykjavík, sem berjast fyrir réttindum flóttafólks, segist hafa fengið skilaboð þess efnis að flóttamanninum Mouhammde Lo, sem nú fer huldu höfði í Reykjavík, líði ágætlega miðað við aðstæður en sé mjög kvíðinn vegna þess að vísa á honum úr landi.

Mouhammde Lo sótti um hæli á Íslandi en vegna þess að hann hafði þegar sóttu um, og verið synjað um, hæli í Noregi, ákvað Útlendingastofnun að vísa honum úr landi. Þykja bæði No Borders og Mouhammde víst að verði hann sendur til Noregs, verði hann þaðan sendur til heimalands síns, Máritaníu, en þar bíða hans hugsanlega pyntingar og/eða dauði.

Talsmaður No Borders bendir á að samkvæmt Dyflinarreglugerðinni, sem Útlendingastofnun vísar í við ákvörðun sína, sé ríkjum ávalt heimilt að taka upp hælisumsókn og beri engin skylda til að vísa fólki úr landi.

Hann bendir enn fremur á að þar sem Mouhammde hafi ekki fengið túlk sem talaði málið hans hafi málsmeðferðinni verið ábótavant.

Útlendingastofnun hefur sagt að málinu sé lokið af sinni hálfu og innanríkisráðherra, Ögmundur Jónasson, hefur ekki viljað svara ábendingum No Borders um lagaleg atriði málsins.