„Ég hef starfað við sprengingar og þekkti um leið að þetta var eitthvað því líkt. Það virtist sem það yrðu þrjár sprengingar á minna en sekúndu. Það sagði manni að þetta væri sprengiefni,“ sagði Elfar Eiríksson, skipstjóri, sem hefur starfað við sprengingar.

Hann sagði að þeir sem vinni við að sprengja vegna framkvæmda læri ýmislegt um sprengingar, eins og að hlusta og greina þær. 

Elfar var staddur við Akershusvirkið skammt frá þar sem sprengingin varð í miðborg Osló í dag. Elfar er nú skipstjóri á dráttarbáti í Noregi og var á leið í kaffi með félaga sínum þegar sprengingin varð. 

„Svo sá ég reykinn stíga upp og sá að það var brennisteinn í reyknum og vissi að þetta var sprengiefni. Það stígur gulbrúnn reykur upp af svona sprengiefnum. Hljóðið sannfærði mig líka strax.

Við horfðum hvor á annan félagarnir og voru vissir um að sprengingin varð ekki niðri í jörðinni. Hún var svo svakalega hávær og við fundum þrýstibylgjuna sem kom á okkur. Þetta gat ekki verið neitt sem tengdist jarðvinnuframkvæmdum.“

Elfar kvaðst hafa kveikt á útvarpinu og farið að fylgjast með fréttum. Þeir félagarnir ákváðu að halda sig fjarri vettvanginum, enda ljóst að þarna væri harmleikur á ferð. 

Elfar var við miðborg Osló til um klukkan 19.00 í kvöld að norskum tíma. Hann taldi sig hafa séð sjúkrabíla í hundraðatali og sagði að margir sjúkrabílar hafi farið áleiðis til Drammen.