Veiðar á uppsjávarfiski hafa tryggt mörgum fiskvinnslustöðvum nægt hráefni í sumar og víða er blússandi gangur. Makríllinn leikur stærra hlutverk með ári hverju. Vinnsla á makríl er mjög árstíðabundin en fiskurinn er aðeins veiddur við Ísland á sumrin.

Síldarvinnslan í Neskaupstað og Skinney-Þinganes á Höfn í Hornafirði hafa til að mynda þurft að fjölga starfsfólki í síld og makríl um nokkra tugi yfir sumarið.

Í umfjöllun um þessi mál í Morgunblaðinu í dag kemur fram, að vinnsla á bolfiski er misjafnari en vinnslustöðvar sem sérhæfa sig í til dæmis ýsu og þorski hafa sumar hverjar þurft að grípa til lokana eða fækka framleiðsludögum yfir sumarið sökum hráefnisskorts. Það er þó ekki algilt en hjá Íslandssögu á Suðureyri er aðallega unninn bolfiskur. Þar er opið í allt sumar og hefur gengið vel, aðallega í þorski, að sögn Óðins Gestssonar framkvæmdastjóra. Hann segir hráefnið að mestu koma frá strandveiðibátunum.