„Við höfum íhugað að skilja,“ segir faðir tveggja ungra barna, en hann og konan hans eru á hrakhólum með húsnæði. Fjárhagsstaða fjölskyldunnar er veik, en hún myndi batna um 780 þúsund á ári ef hjónin taka það skref að slíta hjónabandinu. Við skilnaðinn tvöfaldast barnabætur og húsleigubætur fjórfaldast.

Það er ekki bara þessi fjárhagslega hlið málsins sem hefur leitt til þess að hjónin íhuga að skilja á pappírunum. Þau eru að missa leiguíbúð sína og finna hvergi aðra íbúð í sama hverfi þrátt fyrir mikla leit. Ef þau ákveða að skilja ætlar konan að skrá lögheimili sitt hjá vinkonu sinni og þar með er tryggt að yngra barnið heldur sínu leikskólaplássi. Þá getur fjölskyldan leitað að hentugu íbúðarhúsnæði í öðrum hverfum.

Séra Vigfús Þór Árnason, prestur í Grafarvogi, hefur margoft bent á að það sé óeðlilegt að stuðningskerfi við barnafólk sé þannig uppbyggt að hjón hagnist fjárhagslega á því að skilja. Meðal annars hefur hann rætt málið við þrjá fjármálaráðherra.