Surtsey í sudda, útvörður Íslands í suðri. Árni Sæberg

Tungljurt, járnsmiður og silfurrani eru meðal nýrra landnema sem vísindamenn Náttúrufræðistofnunar hafa fundið í Surtsey. Hafa þeir nýlokið árlegum rannsóknarleiðangri sínum til eyjarinnar.

Gerðu vísindamennirnir rannsóknir á jarðfræði og lífríki eyjarinnar. Samkvæmt vef Náttúrufræðistofnunar Íslands er það sem hæst ber eftir leiðangurinn að tungljurt (Botrychium lunaria) fannst í eynni í fyrsta sinn en hún er sjötugasta tegund háplantna sem nemur þar land.

Tungljurt er smávaxinn burkni af naðurtunguætt. Tegundin er útbreidd og algeng um land allt. Hún vex þar sem gróður er fremur gisinn og lágvaxinn. Í Surtsey fannst tungljurt á þremur blettum í rýru graslendi á suðurhluta eyjarinnar. Þrátt fyrir að ný tegund hafi skotið rótum fækkaði í flóru eyjarinnar um eina tegund frá 2010. Alls voru nú skráðar 59 tegundir háplantna á lífi af þeim 70 tegundum sem þar hafa fundist.

Af smádýrum fundust tvær nýjar tegundir bjallna, járnsmiður og silfurrani.

Sjávarrof meitlar stöðugt af eynni og talsverðar breytingar hafa orðið á norðurtanga eyjarinnar frá síðasta ári. Á 44 árum hefur ströndin á vestanverðum tanganum færst um 500 metra inn að hrauni sem rann út á tangann í lok Surtseyjargossins, 1967.

Frétt á vef Náttúrufræðistofnunar Íslands.