Lax í Elliðaám mbl.is/Einar Falur Ingólfsson

Laxveiði hefur gengið vel í Elliðaánum í sumar, og eru árnar með gjöfulustu veiðisvæðum landsins, samkvæmt yfirliti Landssambands veiðifélaga sem nálgast má hér.

Þorsteinn Húnbogason, veiðivörður í Elliðaánum, segist hafa verið bjartsýnn fyrir sumarið og að veiðin hafi því ekki komið sér sérstaklega á óvart. Þegar þetta er ritað hefur 721 lax verið veiddur í ánum. Í fyrra veiddust alls 1164 laxar í ánum, en veiðitímabilinu lýkur 31. ágúst.

„Mig grunar að hápunkturinn hafi verið fyrir fjórum dögum þegar 55 [laxar] komu á land,“ segir Þorsteinn. Dagana á eftir voru þeir 39, 32 og 23 í gær. Hann segir samanburðinn við aðrar ár þó hugsanlega skýrast að hluta af því að veiðin hafi ekki hafi verið góð þar.

Hann segir það sína tilfinningu að göngur hafi hafist 10 til 12 dögum seinna en í fyrra, og veiðarnar þar með líka. „Veiðin datt niður í endaðan júlí í fyrra en ég held að hún detti seinna niður núna,“ segir Þorsteinn. Laxinn sem kom í árnar snemmsumars hafi verið vel vænn, en nokkuð sé tekið að bera á smærri löxum nú.

Veiðimenn eru vitaskuld ánægðir með gengið, en 6 stangir eru leyfðar í ánum. „Já, það eru nánast allir hamingjusamir hér við árnar,“ segir Þorsteinn.

Hægt er að fylgjast með fiskiteljara sem staðsettur er á móts við rafstöðina í Elliðaánum á þessari vefsíðu. Þegar þetta er ritað voru rúmlega 1600 laxar gengnir í gegnum teljarann. Þar fyrir utan hafa á bilinu 400 til 500 laxar veiðst fyrir neðan teljara, segir Þorsteinn.