Fólk er byrjað að hita upp fyrir Húkkaraballið í Eyjum í kvöld. Eyjafréttir

Það stefnir í að þjóðhátíð í Vestmannaeyjum verði eitthvað fámennari í ár en í fyrra þegar metaðsókn var að henni. Verið er að leggja lokahönd á undirbúning og segi Páll Scheving, formaður þjóðhátíðarnefndar, að allt verði tilbúið á tilsettum tíma.

„Við erum búin að steypa upp varanlegt svið sem verður tekið í gagnið á morgun. Það hefur staðist tímaáætlun þannig að það verður allt í góðu hjá okkur. Svo hefur verið loftbrú milli lands og Eyja og Herjólfur hefur siglt vandræðalaust í Landeyjahöfn í gær og í dag,“ segir Páll.

Það stefni þó í að hátíðin verði eitthvað fámennari en í fyrra en þá var slegið met þegar um 17 þúsund manns sóttu þjóðhátíð. „Þetta verður stórhátíð en ekki eins fjölmenn og hún var á síðasta ári, ég held að það liggi nokkuð ljóst fyrir.“

Klukkan ellefu í kvöld hefst svo hið árlega Húkkaraball sem Páll segir óhætt að segja að beri nafn með rentu.

„Það er svona ungviðið sem leggur af stað þar. Mér skilst að þau hafi enst talsvert mörg samböndin sem hafa verið húkkuð upp á á þessum dansleik,“ segir Páll.