Allt sat fast í Norðfjarðargöngum í gærkvöldi eftir brekkusöng og flugeldasýningu á Neistaflugi. Sævar Guðjónsson

Umferðaröngþveiti myndaðist í Norðfjarðargöngum í gærkvöldi eftir að brekkusöng á Neistaflugi á Neskaupsstað lauk. Tveir flutningabílar fóru inn í einbreið göngin að sunnanverðu og stífluðust þau þegar þeir mættu bílum úr gagnstæðri átt. Tók um hálftíma til þrjú korter að greiða úr flækjunni.

Sævar Guðjónsson, íbúi á Eskifirði, var einn þeirra sem sat fastur í göngunum þegar hann var á leið heim til sín. Hann segir flutningabílana tvo hafi farið inn í göngin að sunnanverðu hvor á eftir öðrum. Annar þeirra hafi komist inn í útskot þegar þeir mættu bílum í göngunum en hinn hafi hins vegar ekki komist. Ekkert pláss var í göngunum til að bakka og sat þá allt fast.

„Það er aldrei of oft sagt hvað þetta eru hrikalega hættuleg göng. Ég var á ferðinni með fjölskylduna og það var frekar óþægilegt að vera með börnin inn í fullum göngum af útblæstri bifreiða og geta ekkert gert. Það er engin loftræsting í göngunum og slæm lýsing,“ segir Sævar.

Þá hafi hann ekki séð neina neyðarsíma þar sem þeir hefðu átt að vera og ekkert gsm-samband er í göngunum. Ekki leystist úr flækjunni fyrr en lögreglan kom á staðinn.

Sjálfur fór Sævar svo gamla veginn um Oddsskarð í svarta þoku eftir að hafa þurft að bakka um 400-500 metra út úr göngunum.

Íbúar settu upp viðvörunarskilti

Sett voru skilti á sitt hvort opið á göngunum um helgina þar sem varað er við grjóthruni inni í þeim. Hefur Vegagerðin enn ekki sett varúðarskilti sem varar við því en í vor féllu tveir steinar á gólf ganganna. Annar þeirra vó 80 kíló og hinn 100 kíló.

Skilti sem sett var upp við Norðfjarðargöng fyrir helgina.