Íslensk stjórnvöld munu ekki gera athugasemdir við löndunarbann Norðmanna á makrílafla íslenskra fiskiskipa. Sambærilegt bann gildir við löndun erlendra fiskiskipa, þ.á m. norskra skipa, á makríl hér á landi.

Tómas H. Heiðar, aðalsamningamaður Íslands í viðræðum um makrílveiðar, segir að íslensk lög banni sjálfkrafa löndun erlendra fiskiskipa í íslenskum höfnum á afla úr sameiginlegum stofnum sem samkomulag hafi ekki tekist um stjórnun á. Sambærileg löggjöf sé í gildi í Noregi.

Tómas gefur lítið fyrir nýlegar fullyrðingar ESB og Noregs um allsherjarinnflutningsbann á íslenskum og færeyskum sjávarafurðum. „Við göngum út frá því að ESB og Noregur virði reglur þjóðaréttar um milliríkjaviðskipti í hvívetna,“ segir Tómas. Slíkt allsherjarbann bryti í bága við EES-samninginn, meðal annars bókun 9, og samninga Alþjóðaviðskiptastofnunarinnar (WTO).

„Það sem nú er brýnast er hins vegar er að Noregur og ESB, stærstu hagsmunaaðilarnir í makrílveiðum, axli þá ábyrgð sem því er samfara og leggi sitt af mörkum til að samkomulag náist um stjórnun veiðanna.“