Mál stúlkunnar ekki einsdæmi
Flugvallarsvæðið í Billund.
Það er ósanngjarnt af talsmanni Iceland Express að vísa ábyrgð á því að 14 ára stúlku hafi verið vísað frá í Billund á starfsmann þjónustuaðila því það sé ekki einsdæmi. Þetta segir Kolbrún Ævarsdóttir en 14 ára gömlum syni hennar var vísað frá ásamt fimm manna fjölskyldu sem hann ferðaðist með vegna yfirbókunar þremur dögum síðar á Billund-flugvelli.
Heimir Már Pétursson, upplýsingafulltrúi Iceland Express, segir augljóst að þjónustufyrirtækið Billund Airport Handling hafi gert mistök með því að auglýsa ekki eftir farþegum sem voru tilbúnir til að verða eftir heldur hafi starfsmaður þess meinað 14 ára stúlku ásamt öðrum manni um að koma um borð þann 13. júlí.
„Við komumst svo að því að hann var á leið í sumarfrí daginn eftir og lá greinilega svona á að hann nennti ekki að vinna vinnuna sína. Við höfum kvartað við þjónustuaðilinn yfir þessari framkomu sem er í algerri andstöðu við starfsreglur Iceland Express,“ segir Heimir Már.
„Mér finnst þetta ósanngjarnt því þetta er ekki einsdæmi. Þetta er ekki að koma upp í fyrsta skipti með þessari stúlku,“ segir Kolbrún sem búsett er í Danmörku. Þegar sonur hennar og vinafjölskylda hafi komið að innritunarborði á Billund þann 16. júlí hafi þeim verið tjáð að yfirbókað væri í vélina. Ekki var auglýst eftir sjálfboðaliðum til að verða eftir gegn greiðslu bóta líkt og evrópskar reglur gera ráð fyrir.
Stafsmenn á vellinum hafi hins vegar verið allir af vilja gerðir til að aðstoða þau en hins vegar hafi ekki náðst í fulltrúa Iceland Express í síma fyrr en eftir að vélin var farin. Þá var þeim sagt að þau gætu ekki flogið fyrr en mánudaginn 18. júlí og þá frá Kaupmannahöfn.
Kolbrún reyndi að hafa samband við fyrirtækið eftir þetta og óskaði eftir í tölvupósti frá 21. júlí að hún fengi tvo flugmiða í bætur. „Mér fannst það ekki ósanngjörn krafa að fá flugmiða fyrir hann og fylgdarmann því ekki læt ég hann ferðast einan,“ segir Kolbrún.
Ekkert svar hafi hins vegar borist fyrr en hún ítrekaði póstinn í fyrradag. Kröfu hennar hafi verið neitað og henni boðinn einn flugmiði eða 400 evrur eins og reglur kveða á um.
„Ég féllst á 400 evrurnar því ég hef ekki áhuga á frekari viðskiptum við þá,“ segir Kolbrún.
