Guðmundur Örn Ólafsson eldsmiður að störfum á sýningarsvæðinu á Hrafnagili. mbl.is/Skapti Hallgrímsson

Gestir á handverkshátíð á Hrafnagili í Eyjafirði hafa aldrei verið fleiri. Guðrún Bjarnadóttir var í gær valin Handverksmaður ársins. Guðrún á og rekur fyrirtækið Hespu, sem framleiðir og selur jurtalitað ullarband.

Á milli þess sem gestirnir gengu um sýningarsvæðið og keyptu spennandi varning af handverksfólki og hönnuðum gáfu þeir sér tíma til að setjast niður og njóta eyfirskra veitinga í góða veðrinu.

Í gær fór fram svokölluð ungbændakeppni þar sem Hákon Bjarki Harðarson frá Svertingsstöðum bar sigur úr býtum í karlaflokki og Anna Sonja Ágústsdóttir frá Kálfagerði í kvennaflokki.

Á kvöldvöku í gær, þar sem Hundur í óskilum skemmti gestum, voru veitt verðlaun fyrir Handverksmann ársins  og Sölubás ársins 2011.

Guðrún Bjarnadóttir var eins og áður segir valin Handverksmaður ársins og Hólmfríður Arngrímsdóttir fékk verðlaun fyrir sölubás ársins. Dómnefnd ákvað að veita Bjarna Helgasyni sérstök hvatningarverðlaun en Organelle er hönnunar- og silkiþrykksverkefni Bjarna sem hefur það að markmiði að sameina myndlist, hönnun, náttúru og handverk.

Handverkshátíðin stendur fram á mánudag.