Guðmundur Franklín Jónsson, formaður Hægri grænna, flokks fólksins. mbl.is/Heiðar

Stjórnmálahreyfingin Hægri grænir, flokkur fólksins hefur sent kvörtun til Umboðsmanns Alþingis þar sem umboðsmaður er beðinn um álit varðandi hvort fjármálaráðherra hafi farið að lögum um bankasýslu ríkisins um meðferð og fyrirsvar gagnvart fjármálafyrirtækjum sem ríkið á hlut að við stofnun, rekstur og niðurlagningu SpKef sparisjóðs og stofnun, rekstur og sölu Byrs banka.

Í bréfi Hægri grænna, flokki fólksins til umboðsmanns segir m.a. „Erindi þetta er öðru fremur sent með vísan til 2. mgr. 1. gr. í lögum um BR þar sem segir skýrum orðum: BR fer með eignarhluti ríkisins í fjármálafyrirtækjum, í samræmi við lög, góða stjórnsýslu- og viðskiptahætti og eigendastefnu ríkisins á hverjum tíma, og leggur þeim fé fyrir hönd ríkisins á grundvelli heimildar í fjárlögum.“

Segir jafnframt í bréfi til umboðsmanns að óskað sé eftir úrlausn málsins svo fljótt sem kostur er. Í því samhengi er vakin athygli á skyndilegum starfslokum forstjóra BR. Vísað er til greinargerðar hennar í skýrslu BR fyrir síðastliðið ár. Segir einnig að ætla megi að starfslokin eigi rætur að rekja til þeirra athugasemda sem þar koma fram.