mbl.is

Borgarahreyfingin hefur sagt Guðmundi Andra Skúlasyni, talsmanni sínum og verkefnisstjóra, upp störfum. Til stendur að kæra hann fyrir fjárdrátt. Guðmundur segir engan grundvöll vera fyrir þessum ásökunum og ætlar að kæra stjórnarmenn  Borgarahreyfingarinnar fyrir meiðyrði dragi þeir ekki ásakanirnar til baka.

Guðmundur Andri hefur starfað bæði sem verkefnisstjóri og talsmaður Borgarahreyfingarinnar. Á síðasta stjórnarfundi hreyfingarinnar var ákveðið að segja Guðmundi Andra upp störfum. Hann hefur verið  beðinn að gefa skýringar á rúmlega einnar og hálfrar milljónar króna reikningi frá Samtökum lánþega auk annarra millifærslna, en hann er jafnframt talsmaður Samtaka lánþega.

Í yfirlýsingu segir Guðmundur Andri að  engin gögn hafi verið lögð til grundvallar þessum ásökunum, heldur byggist þær á órökstuddum upphrópunum formanns Borgarahreyfingarinnar, Þórdísar B. Sigurþórsdóttur.

Hann segir að umræddar færslur hafi verið gerðar með samþykki stjórnarinnar og þar að auki hafi hann ekki persónulega séð um bókhald flokksins heldur hafi viðurkennt bókhaldsfyrirtæki séð um það.

 „Um leið og formaður hóf vegferð sína gegn mér með tilhæfulausum og órökstuddum ásökunum bauð ég stjórn strax að fá óháðan aðila til að fara yfir öll mín verk. Því var samstundis hafnað af stjórn,“ segir Guðmundur Andri í yfirlýsingu sinni.

„Að saka mig um fjárdrátt, bókhaldsóreiðu og óheimilan aðgang að reikningum er (...) vítaverð tilraun til mannorðsmorðs. Þeim aðilum sem að þeirri aðför standa, Þórdísi B. Sigurþórsdóttur, formanni stjórnar, Þorsteini Guðmundssyni, ritara stjórnar, og Guðmundi Karli Þorleifssyni stjórnarmanni, hefur því, ásamt Borgarahreyfingunni sem lögaðila, verið gefinn 10 daga frestur til að draga til baka allar ásakanir gegn mér og biðjast á opinberum vettvangi afsökunar á dómgreindarbresti sínum og offorsi. Slíkt yrði af minni hálfu án eftirmála, enda er ég maður sátta.“