Mynd úr myndasafni. mbl.is

Vegagerðin hvetur vegfarendur til að sýna fyllstu aðgát við framkvæmdasvæði og fylgja þeim merkingum sem uppi eru hverju sinni, en framkvæmdir standa yfir víða um land.

Malbikun stendur yfir á Njarðbraut í Reykjanesbæ, milli Stekks og Víkurbrautar. Hjáleið er ofan Hrauneyja.

Unnið er að fyllingum við brú yfir Sporðöldukvísl og því er umferð á um 4 kílómetra kafla á vegi nr. 26 ofan Hrauneyja beint á hjáleið um Hrauneyjafossstöð fram að 10. október.

Umferð til suðurs hefur verið hleypt á nýja akbraut á Vesturlandsvegi í Mosfellsbæ, frá Þingvallavegi að Álafossvegi. Umferð til norðurs verður óbreytt á einni akrein um sinn. Áætlað er að umferð verði komin á endanlegt mannvirki þann 20. ágúst.

Vinna stendur yfir við Suðurlandsveg, frá Lögbergsbrekku að Litlu kaffistofunni. Áætlað er að umferð verði hleypt á veginn í haust.

Vegagerðin og Reykjanesbær byggja undirgöng fyrir gangandi og hestamenn undir Reykjanesbraut við Grænás í Reykjanesbæ. Umferð er beint um hjáleið en gert er ráð fyrir að framkvæmdum ljúki í september.