Sigmundur Davíð Gunnlaugsson formaður Framsóknarflokksins mbl.is/Kristinn Ingvarsson

Sigmundur Davíð Gunnlaugsson, formaður Framsóknarflokksins, lagði til á fundi utanríkismálanefndar í dag að nefndin haldi opna fundi einu sinni í mánuði hið minnsta.

„Utanríkismálanefnd samþykkir að nefndin fundi á opnum fundum a.m.k. einu sinni í mánuði frá og með ágúst 2011 til að ræða málefni sem tengjast ESB umsókn Íslands. Fundirnir skulu opnir almenningi auk þess sem þeim verði sjónvarpað. Utanríkisráðherra skal ætíð sitja þessa fundi auk annarra sem nefndin óskar eftir hverju sinni," segir í tillögu Sigmundar Davíðs.

Í greinargerðinni sem fylgdi með tillögunni kemur fram:

„Þegar Alþingi samþykkti að sækja um aðild að ESB var jafnframt sagt að mikilvægt væri að almenningur gæti fylgst vel með málinu frá fyrsta degi. Krafan eftir hrun bankakerfisins hefur einnig verið gegnsæi og opin vinnubrögð. Það hefur verið gagnrýnt að litlar upplýsingar sé hægt að fá um hvað sé raunverulega að gerast í aðildarferli Íslands, ráðherra túlki þingsályktun Alþingis mjög frjálslega og haldi málinu sér.

Framundan eru mikilvægar ákvarðanatökur sem tengjast ESB umsókn Íslands og í ljósi reynslunnar hafa margir áhyggjur af stöðu mála. Þegar næstu skref eru ákvörðuð þá er mikilvægt að fram fari raunverulegt samráð við Alþingi, almenning og hagsmunasamtök. Opnir fundir í nefndinni myndu bæta þessa þætti og gera þingmönnum sem og almenningi tækifæri á aukinni aðkomu að málinu."