Frá slysstað á Geirsgötu. Ernir Eyjólfsson

 Mennirnir þrír sem voru í bílnum sem skall á hús við Geirsgötu á föstudag með þeim afleiðingum að ungur maður sem var farþegi í bílnum lést, voru allir í bílbeltum, skv. upplýsingum mbl.is. Grunur leikur á að bílstjórinn hafi att kappi í spyrnu með þessum hörmulegu afleiðingum.

 Samkvæmt lýsingum vitna er grunur um að tveir bílar hafi spyrnt frá gatnamótum Kalkofnsvegar og sá sem lenti á húsveggnum hafi verið annar þeirra.

Vilja ræða við tvo ökumenn

Lögreglan á höfuðborgarsvæðinu óskar eftir að ná tali af tveimur ökumönnum í tengslum við rannsókn hennar á slysinu sem varð um hálftíuleytið síðastliðið föstudagskvöld. Bílar þeirra voru á gatnamótum Geirsgötu og Tryggvagötu þegar slysið varð.

Um er að ræða gráa Suzuki-fólksbifreið á hægri akrein (á vesturleið) en talið er að karlmaður hafi ekið bílnum.

Hinn bíllinn kom úr gagnstæðri átt og var á vinstri akrein (á austurleið). Hvorki er vitað hvort karl eða kona ók þeim bíl né heldur hverrar tegundar hann er. Ökumennirnir eru vinsamlegast beðnir um að hafa samband við lögregluna í síma 444-1000.

Talsvert er um hraðakstur og spyrnur á þessum slóðum.