Fólk virðist af einhverjum ástæðum nýta hraunið sem ruslahaug. mbl.is/Sigurgeir

„Svæðið er ekki í eigu Hafnarfjarðarbæjar heldur í einkalandi að mestu leyti í nágrenni við gamla efnisnámu sem var þarna. Þetta var skotæfingasvæði á sínum tíma en búið er að færa það og því eru einhverjir að nýta sér það í óleyfi.“

Þetta segir Sigurður Páll Harðarson, sviðsstjóri umhverfis- og framkvæmdaráðs Hafnarfjarðarbæjar í Morgunblaðinu í dag, en blaðið fjallaði í fyrradag um yfirgengilegan sóðaskap í hrauni vestur af bænum. Sigurður segir að brugðist hafi verið við strax og farið yfir svæðið með starfsmanni heilbrigðiseftirlitsins.

Hann segir að reynt verði að hafa samband við landeigendur, bæði til að tryggja að gripið verði til aðgerða um hreinsun og eins til að koma í veg fyrir að fólk sé að losa sig þar við rusl. Tveir gamlir malarslóðar liggi að svæðinu og verið sé að íhuga hvort það megi ekki loka þeim.