Það ætti að viðra vel til maraþonhlaups á laugardag mbl.is/Kristinn Ingvarsson

Það er ágætis veðurspá fyrir landið á laugardag og ætti því að viðra vel til útiveru á Menningarnótt í Reykjavík.

Lægð verður á leið fram hjá landinu suður undan og vindur því austlægur.  Sú vindátt er fremur hagstæð í Reykjavík og því aðeins andvari eða létt gola, skrifar Einar Sveinbjörnsson, veðurfræðingur á veðurblogg sitt.

Það verður morgunkul eftir sæmilega heiða nótt, en sólin verður fljót að verma og hiti sennilega 9-10°C  þegar Reykjavíkurmaraþon verður ræst.  Spáð er 13-14°C strax um hádegi.  Sólin mun ef af líkum lætur skína glatt allan daginn og hiti gæti farið í þetta 15-16°C, en austanvindurinn er það hægur að hafgola er líkleg síðdegis.  Þá kólnar aftur niður í þetta 11-13°C.  Fallegt kvöldveður, en kólnar hratt um leið og sól lækkar á lofti og rökkvar.  

Óvissan er kannski helst tengd skýjafarinu, hvort himininn verður því sem næst heiður eða að skýjað verði með köflum. Væta af nokkru tagi er frekar ólíkleg og eins að vindur verði nokkur að ráði, skrifar Einar.