Mikill munur er á verði bæði nýrra og notaðra skólabóka fyrir framhaldsskóla. Árni Sæberg

Griffill var oftast með lægsta verðið á nýjum skólabókum fyrir framhaldsskóla samkvæmt verðlagskönnun ASÍ sem gerð var í fyrradag, miðvikudaginn 17. ágúst. Hæsta verðið á nýjum skólabókum var oftast í Pennanum Eymundsson í Kringlunni.

Farið var í 8 verslanir og skoðað verð á 30 algengum skólabókum.
Penninn Eymundsson í Kringlunni var oftast með hæsta verðið á nýjum skólabókum eða á 27 titlum af 30. Griffill var oftast með lægsta verðið á nýjum bókum í þessari verðkönnun en 20 titlar af 30 voru ódýrastir hjá þeim.

Forlagið á Fiskislóð og Office 1 voru næstoftast með lægsta verðið eða á fjórum titlum af 30.

Í þeim verslunum þar sem skiptibókamarkaðir voru, var Griffill oftast með lægsta útsöluverðið á notuðum skólabókum. Penninn Eymundsson var hins vegar oftast með hæsta útsöluverðið á notuðum skólabókum.

Verðmunur á milli skiptibókamarkaðanna var í flestum tilvikum mikill eða um og yfir 50%.

Mikill verðmunur reyndist á útsöluverði nýrra og notaðra námsbóka en verðmunurinn var mjög misjafn á milli verslana.  Mestur verðmunur var hjá Griffli en af þeim bókum sem skoðaðar voru er verðmunurinn á nýjum og notuðum skólabókum frá 121% upp í 260%. Einnig var mikill munur hjá Office 1 eða frá 54% upp í 227%. Í Pennanum Eymundsson var oftast um 100% verðmunur á nýju og notuðum bókum. Rétt er þó að taka fram að ástand notaðra bóka getur verið mjög misjafnt.

Kannað var verð á nýjum bókum eftirtöldum verslunum: Bóksölu stúdenta Hringbraut, Pennanum Eymundsson Kringlunni, Office 1 Skeifunni, Griffli Skeifunni Forlaginu Fiskislóð og Bókabúðinni Iðnú Brautarholti.

Kannað var verð á notuðum bókum í eftirtöldum verslunum: Pennanum Eymundsson Kringlunni, Office 1 Skeifunni, Griffli Skeifunni og A4 Smáratorgi. Mál og menning Laugavegi hafði ekki hafið sölu á skólabókum.

Tekið er fram að hér er aðeins um beinan verðsamanburð að ræða, en ekki er lagt mat á gæði eða þjónustu söluaðila.