mbl.is/Þorgeir Baldursson

Kona, sem þurfti að dvelja lengur á Spáni vegna frestunar á flugi Iceland Express, segir að starfsfólk fyrirtækisins hafi gert allt sem í þess valdi stóð til að auðvelda farþegum biðina og að boðið hafi verið upp á mat og drykk.

„Um leið og það kom fram að vélinni seinkaði, þá varð stöðugt upplýsingaflæði. Það voru tveir starfsmenn á flugvellinum á vegum Iceland Express, Spánverji og Íslendingur,“ segir farþeginn, Fríða Stefánsdóttir, „Okkur var líka gefið upp neyðarnúmer sem við gátum hringt í ef við vorum með einhverjar frekari spurningar.“

Að sögn Fríðu fóru starfsmennirnir á flugvellinum strax í að forgangsraða farþegunum á hótel. „Það var fyrst byrjað á barnafjölskyldum og þeim sem virkilega þurftu á því að halda að komast sem fyrst á hótel.“

Hún segir að farþegana hafi hvorki skort mat né drykk. „Þegar við vorum búin að bíða í um einn og hálfan klukkutíma, þá fór fólk að tala um að það vantaði hressingu. Það var opin kaffitería á vellinum, allir gátu farið þangað og fengu mat og drykk á kostnað Iceland Express.“

Fríða segir farþegana bæði hafa fengið sms-skilaboð og tölvupósta frá félaginu. „Það er ekki með nokkru móti hægt að segja að það hafi verið lélegt upplýsingaflæði,“ segir Fríða. „Ég held að þeir hafi gert eins vel og þeir gátu.“

Að sögn Fríðu var farþegum sagt að þeir myndu fá upplýsingar um gang mála um klukkan tólf á hádegi. „Við eigum þá að fá sms og tölvupóst. Auðvitað er þetta ekkert skemmtilegt, en ég held að Iceland Express hafi staðið sig með sóma.“