Torfhildur Torfadóttir á Ísafirði lést í dag, 107 ára að aldri. Hún var elsti núlifandi Íslendingurinn, fædd í Asparvík í Strandasýslu 24. maí 1904.
Torfhildur var yngst ellefu systkina, átta alsystkina og þriggja hálfsystkina,
og ólst upp í Selárdal í Steingrímsfirði. Nokkur systkinanna náðu háum
aldri, Ásgeir varð 100 ára, Eymundur 96 ára og Guðbjörg 91 árs. Eftir
fermingu var Torfhildur í vinnumennsku í Reykhólasveit í
Austur-Barðastrandarsýslu en flutti síðan til Ísafjarðar og giftist
Einari Jóelssyni sjómanni. Einar lést árið 1981. Þau eignuðust fimm börn
og eru þrjú þeirra á lífi, Torfi 61 árs, Sigurbjörn 69 ára og Kristín
78 ára.
Torfhildur dvaldist á öldrunardeild
Fjórðungssjúkrahússins á Ísafirði. Hún
mjaðmagrindarbrotnaði fyrir viku og var flutt til Reykjavíkur á
Landspítalann í Fossvogi þar sem beinin voru spengd. Torfhildur var síðan flutt aftur til Ísafjarðar.
Guðríður Guðbrandsdóttir, sem varð 105 ára í maí, er nú elst Íslendinga.