Óvenjulega miklar breytingar hafa orðið á Alþingi á þessu kjörtímabili, sem þó er ekki nema hálfnað. Breyting hefur orðið á högum níu þingmanna, en það eru 14% þeirra sem sitja á þingi.

Alltaf er eitthvað um að þingmenn segi sig úr flokkum eða segi af sér þingmennsku. Mestu breytingarnar urðu á kjörtímabilinu 1995-1999, en þá var verið að stofna Samfylkinguna og VG, en þrír flokkar, Alþýðuflokkurinn, Alþýðubandalagið og Þjóðvaki, voru lagðir niður.

Ýmsar ástæður eru fyrir hræringum á þessu þingi. Þrír þingmenn; Björgvin G. Sigurðsson, Illugi Gunnarsson og Þorgerður Katrín Gunnarsdóttir, drógu sig tímabundið í hlé frá þingstörfum vegna mála sem tengjast hruninu haustið 2008. Einn þingmaður, Steinunn V. Óskarsdóttir, sagði af sér vegna gagnrýni sem hún varð fyrir vegna fjármögnunar prófkjörsbaráttu.

Ágreiningur um Evrópumál skýrir að stærstum hluta ákvörðun Ásmundar Einars Daðasonar og Guðmundar Steingrímssonar að segja skilið við flokk sinn. Evrópumál, ríkisfjármál og fleira áttu þátt í úrsögn Atla Gíslasonar og Lilju Mósesdóttur úr þingflokki VG.

Margvíslegur ágreiningur skýrir hins vegar að þingmenn Borgarahreyfingarinnar sögðu sig úr henni og stofnuðu Hreyfinguna. Þráinn Bertelsson átti ekki samleið með öðrum þingmönnum flokksins og gekk í VG. egol@mbl.is

Ekki á leið úr Framsóknarflokknum

Siv Friðleifsdóttir, þingmaður Framsóknarflokksins, segist ekki vera á leiðinni úr Framsóknarflokknum og því ekki á leiðinni til samstarfs við þann hóp sem nú undirbýr stofnun nýs stjórnmálaafls sem ætlar að berjast fyrir aðild Íslands að Evrópusambandinu. Guðmundur Steingrímsson, sem í gær sagði sig úr Framsóknarflokknum og þingflokki hans, er einn þeirra sem undirbúa nú stofnun slíkrar hreyfingar, ásamt ýmsum fyrrverandi framsóknarmönnum, eins og greint var frá í Morgunblaðinu í gær.

Siv sagði í samtali við Morgunblaðið í gær, að vissulega hafi ákveðinnar óánægju gætt innan Framsóknarflokksins frá flokksþingi Framsóknarflokksins nú í vor og nú hafi ýmsir þeirra sem óánægðir hafi verið sagt sig úr flokknum, eins og fram hafi komið undanfarna daga.

„Ég get staðfest það, að ýmsir þeir, sem hafa sagt sig úr flokknum, hafa verið nánir samstarfsmenn mínir og vinir í Framsóknarflokknum um langa hríð,“ sagði Siv. „Ég held að þessi hópur hafi eitthvað verið að hittast að undanförnu, til þess að undirbúa næstu skref, en ég hef ekki tekið þátt í þeim undirbúningi, enda er ég og verð framsóknarmaður. Ég er alls ekki á leiðinni úr Framsóknarflokknum og ætla mér að halda áfram að berjast fyrir mínum áherslum innan flokksins, í Evrópumálum jafnt sem öðrum málum.“

Ekki á leiðinni úr mínum flokki

Ragnheiður Ríkharðsdóttir, þingmaður Sjálfstæðisflokksins, sem er því fylgjandi að aðildarviðræðum Íslands við Evrópusambandið verði fram haldið og þeim lokið, segir að hvorki Guðmundur Steingrímsson né aðrir fyrrverandi framsóknarmenn hafi farið þess á leit við sig, að hún gengi til liðs við sig. „Nei, það hefur ekki verið haft samband við mig, enda yrði það algjörlega árangurslaust. Ég er ekki á leiðinni úr mínum flokki,“ sagði Ragnheiður í samtali við Morgunblaðið í gær.