Ráðhús Reykjavíkur. mbl.is/Hjörtur

Fjármálaskrifstofu Reykjavíkurborgar hefur borist afkomuviðvörun vegna ársins 2011 frá Íþrótta- og tómstundasviði, Menntasviði og Leikskólasviði.

Í öllum tilvikum er varað við því að áætlun um hagræðingu í rekstri nái ekki fram að  ganga eða henni verði ekki náð að fullu á þessu ári vegna þess að innleiðing á breytingum hefur seinkað miðað við það sem áætlun gerði ráð fyrir, útfærslu hagræðingar hefur verið breytt eða útfærslu ekki lokið.

Þetta kemur fram í minnisblaði með skýrslu fjármálaskrifstofu borgarinnar um 6 mánaða uppgjör borgarinnar, en borgarráð ákvað í dag að gera skýrsluna opinbera.

Í minnisblaðinu segir, að í einhverjum tilvikum sé kostnaður að fara framúr áætlun vegna utanaðkomandi ástæðna og greiðslur ekki að berast frá ríki í samræmi við áætlanir.

Hundruð milljóna útgjöld umfram heimildir

Sviðsstjóri telur stefna í að útgjöld íþrótta- og tómstundasviðs verði að lágmarki um 105 mkr umfram fjárheimildir. Uppgjör fyrir tímabilið janúar–apríl sé þegar farið að sýna ákveðin hættumerki, s.s. tekjutap sundlauga og frístundaheimila m.v. fjárhagsáætlun, þrátt fyrir að sviðið sé undir heimildum í heild sinni á tímabilinu.

Útgjöld menntasviðs stefna að lágmarki í 135 milljónir króna umfram fjárheimildir. Segir í minnisblaðinu, að uppgjör fyrir tímabilið janúar–apríl sé þegar farið að sýna ákveðin hættumerki og sé rekstur sviðsins 123 milljónir yfir fjárheimildum á tímabilinu.

Þá stefnir í að útgjöld leikskólasviðs verði 62 milljónir umfram fjárheimildir. Ástæður vandans eru einkum sagðar þær, að skipulagsbreytingar hafi tafist og sameiningar færri en áætlað var, úthlutunarreglur vegna sérkennslu hafi ekki verið endurskoðaðar eins og til stóð, langtímaveikindi séu meiri og hráefniskostnaður í mötuneytum hafi hækkað og einnig leiga vegna flutninga sviðsins frá Fríkirkjuvegi í Borgartún.

Skýrsla fjármálaskrifstofu um uppgjöf borgarinnar