Forseti Litháens á Bessastöðum
Forseti Litháens, Dalia Grybauskaitė er í opinberri heimsókn á Íslandi og var á Bessastöðum í dag. mbl.is/Ernir Eyjólfsson
Dalia Grybauskaitė, forseti Litháens, kom í opinbera heimsókn til Íslands í dag en á morgun verða liðin nákvæmlega 20 ár frá því að Íslendingar urðu fyrstir þjóða til að viðurkenna fullt sjálfstæði Eystrasaltsríkjanna þriggja.
Í heimsókn forseta Litháens verður þeirra tímamóta minnst með ýmsum hætti, m.a. með sérstakri athöfn í Höfða að morgni föstudagsins 26. ágúst en þar undirrituðu utanríkisráðherrar Eystrasaltsríkjanna og Íslands samkomulag þessa efnis 26. ágúst 1991.
Í fylgdarliði forseta Litháens er Audronius Ažubalis utanríkisráðherra landsins auk embættismanna frá embætti forseta og utanríkisráðuneyti Litháens.
Forseti Íslands Ólafur Ragnar Grímsson og Dorrit Moussaieff forsetafrú tóku á móti Grybauskaitė á Bessastöðum síðdegis í dag að viðstöddum ráðherrum úr ríkisstjórn Íslands og embættismönnum.
Í kvöld bjóða íslensku forsetahjónin til hátíðarkvöldverðar á Bessastöðum til heiðurs forseta Litháens.
Jón Gnarr borgarstjóri í Reykjavík og forseti Íslands standa fyrir athöfn í Höfða í fyrramálið. Meðal dagskrárliða við athöfnina eru ávörp borgarstjórans í Reykjavík og forseta Litháens en jafnframt mun litháski píanóleikarinn Mūza Rubackytė leika verk eftir landa sinn Mikalojus Konstantinas Čiurlionis og Arnór Hannibalsson ræðismaður Litháens á Íslandi taka við heiðursviðurkenningu frá forseta Litháens.
Frá Höfða liggur leiðin í samhæfingarmiðstöðina í Skógarhlíð þar sem m.a. Georg Lárusson forstjóri Landhelgisgæslunnar, Magnús Tumi Guðmundsson prófessor, Margrét Laxdal varaformaður Landsbjargar og Kjartan Þorkelsson sýslumaður á Holsvelli kynna miðstöðina og viðbrögð við nýlegum eldgosum í Eyjafjallajökli og Grímsvötnum. Heimsóknin í Skógarhlíð hefst kl. 10:35.
Ásta Ragnheiður Jóhannesdóttir forseti Alþingis tekur á móti hinum lithásku gestum í Alþingi klukkan 11:40 og býður þeim til hádegisverðarfundar með fulltrúum stjórnmálaflokka í utanríkismálanefnd.
Forseti Litháens flytur inngangserindi að hringborðsumræðum sem hefjast í Þjóðmenningarhúsinu kl. 13:20. Þátttakendur í umræðunum verða m.a. þingmenn, embættismenn, háskólafólk og fulltrúar félagasamtaka og fjölmiðla. Umræðunum stýrir Þóra Arnórsdóttir fréttamaður. Eftir hringborðsumræðurnar munu forseti Litháens og fylgdarlið skoða handritasýninguna í Þjóðmenningarhúsinu undir leiðsögn Sigurgeirs Steingrímssonar fræðimanns á Árnastofnun.
Forseti Litháens mun opna sýningu í Norræna húsinu kl. 16:30 sem helguð er minningu litháska tónlistar- og myndlistarmannsins Mikalojus Konstantinas Čiurlionis (1875-1911). Við það tækifæri mun Mūza Rubackytė píanóleikari jafnframt flytja verk eftir hann.
Formlegri dagskrá opinberrar heimsóknar forseta Litháens til Íslands lýkur á Þingvöllum að kvöldi föstudagsins 26. ágúst. Eftir skoðunarferð um þjóðgarðinn mun forsetinn eiga fund með Jóhönnu Sigurðardóttur forsætisráðherra. Í kjölfar fundarins býður forsætisráðherra til kvöldverðar á Þingvöllum.
Áður en forseti Litháens fer af landi brott laugardaginn 27. ágúst mun hún fyrri hluta þess dags heimsækja Hellisheiðarvirkjun og skoða Geysi og Gullfoss, að því er fram kemur á vef forsetaembættisins.
