„Það er ekkert eftir til að ná endum saman“
Sigmundur Davíð Gunnlaugsson, formaður Framsóknarflokksins. mbl.is/Ernir Eyjólfsson
„Skuldavandi heimilanna er orðinn slíkur að vart verður við ráðið lengur. Það hlýtur að vera forgangsverkefni okkar allra að leysa fólkið í landinu úr böndum húsnæðisskulda og atvinnuleysis,“ segir Sigmundur Davíð Gunnlaugsson, formaður Framsóknarflokksins, í pistli á heimasíðu sinni í dag. Hann bendir á að fyrir tveimur árum hafi ríkisstjórnin sagt að um þetta leyti hefði botninum á efnahagskreppunni hér á landi verið náð og heimili og fyrirtæki ættu að sjá ljós við enda ganganna.
„Í dag er það öðru nær. Atvinnuleysi mælist enn rúmlega 6 prósent, næstum jafn mikið og í upphafi árs 2009. Engar afgerandi lausnir bjóðast á húsnæðisskuldum heimilanna og ekki hefur verið ráðist í neinar almennar aðgerðir til skuldaniðurfellingar, sem kæmu þeim best sem mest þurfa á þeim að halda. Sú leið sem ríkisstjórnin boðaði eftir fjöldamótmæli í október 2010, hin svokallaða 110% leið, hækkar nú að líkindum í 130% leið vegna efnahagslegrar óstjórnar og óþarfra vaxtahækkana sem ekki sér fyrir endann á,“ segir Sigmundur.
Hann segir að aðferðafræði ríkisstjórnarinnar hafi ekki virkað og aðeins boðið almenningi upp á vaxandi skatta og niðurskurð og enga efnahagsuppbyggingu og fjárfestingu.
„Þeir sem gátu í tvö ár haldið rekstri heimilisins á floti með því að nýta ævisparnað sinn, með snemmbærri úttekt lífeyrissparnaðar eða með söfnun kreditkortaskulda, eru nú þremur árum frá hruni komnir að enda vegarins. Það er ekkert eftir til að ná endum saman,“ segir ennfremur í pistlinum.
