200 lítrar af málningu fóru á gafl verksmiðjunnar og efstu hæðina. mbl.is/Helgi

„Markmið okkar er að varðveita húsið og við gerum það með öllum tiltækum ráðum,“ segir Héðinn Ásbjörnsson sem ásamt fjölskyldu sinni rekur ferðaþjónustu í Djúpavík á Ströndum. Áhugamenn um varðveislu gömlu síldarverksmiðjunnar vinna að stofnun áhugamannafélags til að styðja við bakið á eigendunum.

Síldarverksmiðjan í Djúpuvík í Reykjarfirði á Ströndum er gríðarmikið mannvirki og merkilegt í byggingarsögunni. Verksmiðjan var byggð 1934 og tekin í notkun árið eftir. Hún var stærsta bygging sem reist hafði verið úr steinsteypu á Íslandi á þeim tíma.

Í umfjöllun um mál þetta í Morgunblaðinu í dag kemur fram, að Skúli Alexandersson, fyrrverandi alþingismaður, sem alinn er upp í Djúpavík, hafi áhuga á að stofna áhugamannafélag til að hjálpa til við varðveislu hússins. Héðinn tekur vel í það og segir að öll hjálp sé vel þegin, hvort sem hún sé í formi vinnu eða fjárframlaga.

Sögusýning um Djúpavík er í vélasal verksmiðjunnar og fá margir leiðsögn um hana á sumrin. Segir Héðinn að fólk hafi mikinn áhuga á mannvirkinu. „Það verður að varðveita þetta merka hús en vitaskuld þarf síðan að finna því nútímahlutverk,“ segir Héðinn og bætir við að enginn hörgull sé á hugmyndum um nýtingu þess. Hann nefnir að listafólk hafi notað það til sýningahalds og tónlistarflutnings og vel færi á því að auka það.