Á flæmska hattinum. Ljósmynd/Þorgeir Baldursson

Jón Bjarnason sjávarútvegs- og landbúnaðarráðherra hefur að höfðu samráði við útgerðaraðila og stofnanir breytt reglugerð um nýtingu afla og aukaafurða. Með breytingunni er aðlögunarfrestur útgerðaraðila lengdur og ýmis atriði gerð markvissari og skýrari.

Í fréttatilkynningunni frá ráðuneytinu segir að með reglugerðarbreytingunni séu mikilvæg skref stigin í þá átt að bæta nýtingu sjávarafla okkar og bæta umgengnina við sjávarauðlindina.

Í nýlegri skýrslu ráðuneytisins „Bætt nýting bolfisks“ frá október 2010, sem unnin var af samráðshópi greinarinnar og stofnana ráðuneytisins, kemur fram sú stefnumörkun að skapa sem mest verðmæti úr þeim sjávarafla sem til fellur. Í skýrslu Matís, „Bætt nýting sjávarafla“, frá maí 2010, getur að líta greinargott yfirlit um þá möguleika til aukinnar verðmætasköpunar sem hér eru fyrir hendi. Reglugerðin tekur mið af þessari stefnu.

Rétt er hér að vekja sérstaka athygli á þeirri meginreglu laga nr. 57/1996 um umgengni við nytjastofna sjávar, að skylt er að hirða og landa öllum afla sem í veiðarfæri koma. Öll frávik frá þessari reglu eru í reynd undantekningar þar frá.