Gæti aukið áhrif Kínverja í N-Atlantshafi

Financial Times segir frá fyrirhuguðum fjárfestingum Kínverjans Huang Nubo á Íslandi. Á heimasíðu blaðsins segir að Huang hyggist fjárfesta í ferðaþjónustu á Íslandi fyrir 100 milljónir bandaríkjadala. Viðskiptin eru sögð umdeild þar sem menn óttist að með þeim geti stjórnvöld í Kína náð áhrifum á Íslandi og í Norður Atlantshafi.

Huang Nubo er umsvifamikill í fasteignaviðskiptum um allan heim. Hann hefur mikinn áhuga á að kaupa jörðina Grímsstaði á Fjöllum. Jörðin er ein sú stærsta á landinu en hún þekur um 0,3% af Íslandi.

Financial Times nefnir að Ísland sé meðlimur í Nato og staðsett á mjög mikilvægum stað, sérstaklega í ljósi nýrra siglingaleiða sem gætu opnast milli Evrópu og Ameríku. Þá gæti Ísland reynst mikilvæg höfn fyrir stór flutningaskip frá Asíu í náinni framtíð.

Í frétt FT er talað við Ögmund Jónasson innanríkisráðherra,sem segir að skoða þurfi kaup Huangs mjög vel og gæta þurfi varúðar í ljósi þess að Kínverjar hafi undanfarið keypt upp stór landsvæði víðs vegar um heiminn.

Í fréttinni eru einnig rakin tengsl Huangs við kínverska kommúnistaflokkinn en eins og fram hefur komið er hann nokkuð virtur meðlimur flokksins. Þá var hann lengi starfsmaður áróðursmálaráðuneytis Kína og í ráðuneyti framkvæmda.

• 4 blogg um fréttina

Bloggað um fréttina

• Kristinn Snævar Jónsson: Viðvörun Einars Þveræings
• Viggó Jörgensson: Setja upp eldflaugapalla og ratsjárnet.
• Jón Pétur Líndal: Notum kínversku aðferðina á þetta.
• Guðrún María Óskarsdóttir.: Hvar er stefnumótun stjórnvalda í þessum efnum ?