Gæsluvélin til Senegals
Setja bókamerki
TF-SIF, flugvél Landhelgisgæslunnar, lagði nú í morgun af stað til Senegals í Afríku þar sem hún mun sinna landamæragæslu fyrir Frontex, Landamæraeftirlitsstofnun Evrópusambandsins næsta mánuðinn.
Flugvélin var við landamæraeftirlit í Miðjarðarhafinu frá maílokum þar til í byrjun ágúst. Þá stóð til að hún færi til Senegals en Frontex tók þá ákvörðun um að í bili væri verkefnum hennar lokið þar sem Evrópuþingið hafði ekki tekið ákvörðun um viðbótarfjármagn í þetta landamæraeftirlit.
En nú hefur staða mála breyst á ný og Frontex óskaði eftir því að FT-SIF færi til eftirlits í Senegal í september. Fimm manna áhöfn er í vélinni, flugstjóri, flugmaður, flugvirki og tveir stýrimenn og að auki er fulltrúi Landhelgisgæslunnar í stjórnstöð Frontex á Spáni þangað sem upplýsingar frá flugvélinni eru sendar. Að sögn Hrafnhildar Brynju Stefánsdóttur, upplýsingarfulltrúa Landhelgisgæslunnar, verður skipt um áhöfn eftir hálfan mánuð.
Hrafnhildur sagði að sóst væri eftir TF-SIF í þessi verkefni enda ekki margar flugvélar af þessari stærð sem væru jafn vel tækjum búnar og flugvélin.
Í samningunum við Frontex væru síðan ákvæði um að kalla mætti vélina heim ef aðstæður á Íslandi krefðust þess. Vélin kom m.a. að góðum notum í eldgosinu í Eyjafjallajökli á síðasta ári.
Hrafnhildur Brynja sagði að þessi verkefni fyrir Frontex kæmu sér vel fjárhagslega fyrir Landhelgisgæsluna. Þá öfluðu starfsmenn Landhelgisgæslunnar sér dýrmætrar reynslu.
Varðskipið Ægir er nú á Miðjarðarhafi í verkefnum fyrir Frontex.
Þrjú og hálft ár fyrir skotárás í Úlfarsárdal
„Tíminn er runninn út fyrir Kristján Loftsson“
Benda á Samgöngustofu sem bendir út í heim
Segir óábyrgt að skipta út öllu bankaráðinu
Sat á þaki byggingarinnar þegar eldurinn kviknaði
Starfsfólk gæti fengið reikning frá Skattinum
Markaðurinn hitnar og leiguverð hækkar hratt