Fellibylurinn Írena olli miklu tjóni í Bandaríkjunum í síðustu viku, en leifar hennar munu ylja Íslendingum um hjartarætur, með smá vætu. Reuters

Leifar fellibylsins Írenu ganga hér á land á morgun í formi lægðar sem er krappari en gerist og gengur á þessum árstíma. Þó er ekki um neina haustlægð að ræða, segir Einar Sveinbjörnsson veðurfræðingur, þar sem lægðinni fylgja nokkur hlýindi. Von gæti verið á fyrstu haustlægðinni eftir helgi þegar kólna fer í veðri.

Einar segir að það vanti allan kulda í leifarnar af Írenu. Hún beri með sér mjög hlýtt loft. Helst má búast við hvassviðri og úrkomu sunnan- og vestanlands á morgun en áframhaldandi hlýindum á Norðaustur- og Austurlandi. Hiti fór þar hæst í 21,1 gráðu á Egilsstöðum. Svipuð hlýindi voru á Hallormsstað og tæp 20 stig í Neskaupstað. Einar reiknar með svipuðu hitastigi á morgun, það fari þó eftir skýjafarinu.

Miðað við langtímaspá segir Einar að búast megi við lægð að landinu eftir helgina, sem geti flokkast til haustlægðar, með auknum kulda og meiri úrkomu en fylgir leifunum af Írenu.