mbl.is/RAX

Ræst hefur úr sumrinu og heyfengur er nægur í flestum sveitum. Þó er heyfengur lítill á einstaka svæðum, eins og til dæmis kalsvæðunum norðaustanlands og öskusvæðinu í Skaftárhreppi. Útlit er fyrir að hægt verði að bjarga því innan héraða.

Vegna kulda og þurrka í vor og framan af sumri var spretta almennt lítil á Suðurlandi, að sögn Sveins Sigurmundssonar, framkvæmdastjóra Búnaðarsambands Suðurlands. Þegar hlýnaði og byrjaði að rigna spruttu grös vel. „Það var eins og þau hefðu beðið með einhvern kraft,“ segir Sveinn. Þá hefur heyskapur almennt gengið vel.

Sveinn telur að heyfengur sé almennt heldur minni en síðustu tvö ár en þó nægjanlegur. Öskufallssvæðið í Skaftárhreppi er undantekning. Þar sé uppskera mun minni. Reiknar Sveinn með að miðla þurfi viðbótarheyi á jarðir þar.

Hundruð hektara túna við utanverðan Eyjafjörð og í Þingeyjarsýslu eyðilögðust vegna kals í vor. Ingvar Björnsson, ráðunautur hjá Búgarði, metur það svo að heyfengur inni í Eyjafirði, á Svalbarðsströnd og í Hörgárdal verði yfir meðallagi og bændur þar aflögufærir með hey, ef bændur á kalsvæðunum þurfi á að halda. Þeir geti einnig bjargað sér með kjarnfóðri.