Héraðsdómur Reykjavíkur mbl.is / Hjörtur

Nítján ára gamall piltur var í Héraðsdómi Reykjavíkur í gær dæmdur í eins árs fangelsi fyrir tilraun til bankaráns, þjófnað, hylmingu, fjársvik og umferðarbrot.

Um fjölmörg mál er að ræða en pilturinn var meðal annars dæmdur fyrir stuld á samloku og kókflösku, farsíma og bifreiðum. Hann var jafnframt dæmdur fyrir akstur undir áhrifum eiturlyfja, tilraun til fjársvika og svo mætti lengi telja.

Í janúar reyndi hann bankarán í útibúi Arion banka í Árbæ er hann kom inn í bankann með andlitið hulið, vopnaður steinhellu, skipaði gjaldkera að afhenda sér peninga og henti á sama tíma steinhellunni í gler á næstu gjaldkerastúku, með þeim afleiðingum að glerið brotnaði, en hann hvarf á braut þegar gjaldkerinn tjáði honum að hann hefði enga peninga til að afhenda honum.

Pilturinn játaði skýlaust brot sín en samkvæmt sakavottorði hófst brotaferill hans um 16 ára aldur eða árið 2008, en þá var ákærði dæmdur í þriggja mánaða skilorðsbundið fangelsi fyrir þjófnað. 

Hann var aftur dæmdur á sama ári fyrir brot gegn valdstjórninni en ekki gerð sérstök refsing.

Á árinu 2009 var hann dæmdur í 12 mánaða fangelsi fyrir rán, brot gegn valdstjórninni, líkamsárás og þjófnað. Á árinu 2010 var hann dæmdur í sex mánaða fangelsi fyrir líkamsárás, þjófnað, brot gegn valdstjórninni, nytjastuld og brot gegn umferðarlögum. Hann var 4. febrúar 2011 dæmdur í tveggja mánaða fangelsi fyrir fjársvik. Loks var honum 22. mars 2011 ekki gerð sérstök refsing í dómi fyrir þjófnað og nytjastuld.