Merki SÍNE

Samband íslenskra námsmanna erlendis (SÍNE) óskar eftir skjótri og farsælli lausn varðandi úthlutun námslána og hvetur félagsmenn sína til að fylgjast vel með þróun mála varðandi nýlega reglugerð um námslán.

Í tilkynningu frá SÍNE segir að fjöldi námsmanna hafi sett sig í samband við sambandið  undanfarnar vikur og bent á reglugerðina, sem „hefur sett skólagöngu þeirra í uppnám“.

„Fjölmargir námsmenn erlendis bíða nú eftir svörum frá Lánasjóði íslenskra námsmanna (LÍN) varðandi svokallaða búsetureglu, sem er að finna undir lið 1.1. í úthlutunarreglum sjóðsins og hljóðar svo: Enn fremur þarf viðkomandi að hafa stundað launuð störf hér á landi síðustu 12 mánuði fyrir umsóknardag, hið skemmsta, og haft samfellda búsetu hér á landi á sama tíma eða starfað í skemmri tíma en 12 mánuði og haft búsetu hér á landi í tvö ár samanlagt á samfelldu fimm ára tímabili sbr. 3. gr. reglugerðar nr. 478/2011,“ segir í tilkynningunni.

Þar segir að þessar breytingar komi í mörgum tilvikum of seint og breyti forsendum fólks til náms.

„Námsmenn sem fara til náms erlendis eiga það sameiginlegt að þurfa að skipuleggja nám sitt fram í tímann, t.d. sækja um skólavist með margra mánaða til árs fyrirvara. Reglugerð þessi er samþykkt 20. apríl 2011, á tíma sem er líklegt að þeir sem hyggja á nám erlendis séu löngu búnir að sækja um í skóla og kynna sér eldri reglur LÍN, og séu því samkvæmt þeim með grænt ljós á framfærslulán. Síðar kemur reglugerðin í ljós. Of seint, því mjög óþægileg óvissa hefur skapast fyrir fjölda námsmanna, sem margir hafa hafið nám og vita ekki í hvorn fótinn á að stíga.“