Frá Edinborg þar sem skoska heimastjórnin er með aðsetur. Árni Sæberg.

Danny Alexander, aðstoðarfjármálaráðherra Bretlands, sagði í ræðu á fundi með kaupsýslumönnum í Glasgow í kvöld, að Skotar hefðu fengið svipuð örlög og Íslendingar þegar bankakreppan skall á ef Skotland hefði verið sjálfstætt ríki. 

Sagði Alexander, að Skotar, sem eru 5,2 milljónir talsins, hefðu orðið að axla 123 milljarða punda skuldir á fjárlagaárinu sem lauk í mars 2010. Yfir helmingur þeirrar upphæðar hefði farið til að bjarga bankanum Royal Bank of Scotland, sem er með höfuðstöðvar í Edinborg. Þá hefði fjárlagahallinn þetta ár verið um 14 milljarðar punda eða einn sá mesti á íbúa í allri Evrópu.

„Reynsla lítilla ríkja með stórt bankakerfi, eins og Íslands og Írlands, hefur sýnt að þetta hefði verið hræðilegt verkefni að fást við ef við hefðum ákveðið að takast á við það einir,“ sagði Alexander. Hann er Skoti og var kjörinn á breska þingið fyrir Frjálslynda demókrata í Inverness. 

Fréttavefur Bloomberg segir, að þessi ummæli séu enn ein tilraun ríkisstjórnar Davids Camerons til að bregða fæti fyrir áform Skoska þjóðarflokksins, flokks Alex Salmonds, forsætisráðherra heimastjórnar Skotlands, um að lýsa yfir sjálfstæði frá Bretum. Salmond hefur lofað því að þjóðaratkvæðagreiðsla um sjálfstæði fari fram árið 2016. 

Danny Alexander.