Ólafur Ragnar skipti um skoðun
Ólafur Ragnar Grímsson, forseti Íslands. mbl.is/Árni Sæberg
Ólafur Ragnar Grímsson lýsti mikilli andstöðu við kaup útlendinga á landi á Íslandi árið 1991 þegar EES-samningurinn var til umræðu. Hann sagði hins vegar í samtali við Financial Times í gær að hann fagnaði kaupum kínversks fjárfestis á Grímstöðum á Fjöllum.
Þegar EES-samningurinn var til umræðu varð nokkur umræða um að samningurinn opnaði fyrir þann möguleika að útlendingar gætu keypt jarðir á Íslandi. Ólafur Ragnar var þá formaður Alþýðubandalagsins og lýsti mikilli andstöðu við þetta.
„Alþýðuflokkurinn hefur verið fylgjandi því að útlendingar ættu að hafa sama rétt og Íslendingar til að gerast bændur og kaupa jarðir hér á landi. Alþýðubandalagið hefur algerlega hafnað þessu innan ríkisstjórnarinnar, og Jón Baldvin [Hannibalsson] er mætavel kunnugt um það að ég mun aldrei samþykkja samning sem felur í sér að útlendingar geta keypt Laxá í Aðaldal eða Hvamm í Dölum,“ sagði Ólafur Ragnar í samtali við Þjóðviljann 13. apríl 1991.
Halldór Blöndal, þáverandi landbúnaðarráðherra, lýsti sömu viðhorfum í þingræðu um málið og nefndi þá Hvamm í Dölum sem dæmi um jarðir sem ekki mættu komast í eigu útlendinga. Halldór ítrekaði efasemdir sínar um að útlendingar fengu að eignast jarðir í grein sem hann skrifaði í Morgunblaðið í vikunni.
Ólafur Ragnar virðist hins vegar hafa skipt um skoðun því hann fagnaði áhuga Huangs Nubos á Grímsstöðum á Fjöllum í samtali við Financial Times. „Kínverjar og Indverjar réttu Íslandi hjálparhönd á margan uppbyggjandi hátt á meðan Evrópa var fjandsamleg og Bandaríkjamenn ekki til staðar,“ hefur blaðið eftir forsetanum.
Ólafur Ragnar sagðist ekki telja ástæðu til þess að óttast fjárfestingar Kínverja á Íslandi á meðan þær sættu nákvæmri skoðun og fagnaði áhuga Kínverja og Indverja á landinu á sama tíma og samskipti við hefðbundna bandamenn í NATO væru orðin stirðari.
