Mosfellsbær

Mosfellsbær hefur fallist á að mæta kröfum Alexanders Hrafnkelssonar um að veita honum ferðaþjónustuúrræði með leigubílum sem tekur mið af þörfum hans sem blinds einstaklings sem rekur sitt eigið fyrirtæki. Málflutningur átti að hefjast í málinu fyrir Héraðsdómi Reykjavíkur í dag en málaferlin hafa verið felld niður í kjölfar samkomulagsins.

Alexander og kona hans reka hestatamningafyrirtækið Hestasýn. Sökum blindu hefur Alexander verið upp á aðra kominn með ferðir til og frá vinnu og til að sinna nauðsynlegum erindum. Samkvæmt lögum ber sveitarfélögum að sjá þeim fötluðu einstaklingum sem ekki geta nýtt sér almenningssamgöngur fyrir ferðaþjónustu. Markmið þeirra þjónustu skal vera að gera viðkomandi einstaklingum kleift að stunda atvinnu og/eða nám og leggja stund á tómstundir, að því er fram kemur á vef Blindrafélagsins.  

„Fram til þessa hefur sú ferðaþjónusta sem Alexander hefur staðið til boða ekki tekið mið af þörfum hans. Voru mál komin í þann farveg að mál Alexanders gegn Mosfellsbæ var tekið fyrir í Héraðsdómi Reykjavíkur í dag, þann 5. september. Með því samkomulagi sem nú hefur náðst munu málaferlin verða felld niður.

Aðspurður kvaðst Alexander vera ánægður með að samkomulag hefði náðst sem gæfi honum færi á að fara ferða sinna þegar honum hentar án þess að þurfa að panta ferðina með allt að 24 klst. fyrirvara. Nú geti hann einfaldlega hringt á leigubíl þegar hann þyrfti að fara á milli bæja og réði nú í fyrsta skipti í mörg ár yfir sjálfstæðum ferðamáta,“ segir á vef Blindrafélagsins.