Neðri hluti Þjórsár. www.mats.is

Af þeim 1.500 megavöttum sem fara í nýtingarflokk samkvæmt þingsályktunartillögu um rammaáætlun um vernd og nýtingu náttúruauðlinda. eru að hámarki 700 megavött því stigi að hægt væri að gera samninga um sölu innan tveggja ára. Samorka, samtök orku- og veitufyrirtækja bendir á þetta í umsögn sinni um tillöguna.

Í umsögninni segir að samkvæmt tillögunni fari 25,6% áætlaðrar orkuvinnslugetu í nýtingarflokk, eða 11.900 GWh, sem samsvarar tæpum 1.500 MW í áætluðu uppsettu afli. Virkjanakostirnir í nýtingarflokki séu mjög mislangt komnir í undirbúningi og mati á umhverfisáhrifum og því breytilegt hvenær þeir geta komið til framkvæmda. Einnig sé yfirleitt nauðsynlegt að nýta jarðhitasvæði í áföngum og óvissan um orkugetu þeirra sé ávallt mikil þar til búið er að rannsaka svæðin með borunum.

Vekur Samorka athygli á því að af þeim orkukostum sem standa að baki þessum tæplega 1.500 megavöttum í nýtingarflokki séu nú að hámarki um 700 megavött á því stigi að hægt væri að gera samninga um sölu á orkunni innan tveggja ára miðað við hugsanlega afhendingu innan 4-6 ára.

Er þá horft til virkjana við neðri hluta Þjórsár, í Hverahlíð, til stækkaðrar Reykjanesvirkjunar, Þeistareykja (m.v. 90 MW) og Bjarnarflags, auk e.t.v. Eldvarpa og Sveifluháls, sem þó eru mun styttra komnar á undirbúningsstigi en hinar framantöldu.

Nokkrir stórir og hagkvæmir virkjanakostir séu í tillögunni settir í verndarflokk, m.a. kostir sem hafa þegar verið rannsakaðir nokkuð ítarlega, svo sem Bitra og Norðlingaölduveita. Einhverjir slíkir eru jafnframt settir þarna í biðflokk, svo sem Trölladyngja, Hólmsárvirkjun og Búlandsvirkjun.

Frétt á vef Samorku.