Sigurður Bessason, formaður Eflingar.

Jafnmargir voru án vinnu í júlí, á háannatíma sumars, á félagssvæði stéttarfélagsins Eflingar og voru atvinnulausir í samdrætti vetrarins í febrúar árið 2010. Þetta segir Sigurður Bessason, formaður Eflingar, í viðtali við Eflingarblaðið.

„Á sama tíma og fækkað hefur atvinnuleysishópnum á almenna markaðnum hefur atvinnulausum fjölgað hjá ríki og sveitarfélögum um rúmlega þá fækkun og gott betur. Í dag er fjöldi atvinnulausra 2520 í félaginu sem er nánast sama talan og var í febrúar 2010 en stóri munurinn liggur í því hvenær tíma árs þessar tölur eru fengnar,“ segir Sigurður og bætir við að menn verði að snúa sér að atvinnuskapandi verkefnum.

Sigurður segir ennfremur í viðtalinu að uggvænlegt sé hvernig langtímaatvinnuleysi er að þróast á landinu. „Mjög er að fjölga í hópi þeirra sem hafa verið lengi án atvinnu. Fyrir ári höfðu 21% þeirra sem voru án vinnu verið án vinnu í eitt ár eða lengur en nú er staðan sú að þessi tala er kominn upp í 58% eða 1464 einstaklingar sem hafa verið án vinnu í eitt ár eða lengur.  Það sér hver maður hvaða félagsleg áhrif þetta fer að hafa á samfélag okkar ef þessi þróun heldur áfram,“ segir hann.