Makríllinn hefur reynst búbót hjá smábátasjómönnum á Snæfellsnesi.

„Makríllinn virðist bara vera í heitari sjó, þar sem sjávarhitinn nær 12 stigum. Norður á Breiðafirði þar sem eru 11 stig þýðir ekki að reyna. Fiskurinn virðist næmur á þetta, vera með góðan hitamæli,“ segir Kristinn Jón Friðþjófsson, útgerðarmaður á Rifi, sem í sumar hefur gert út smábáta á makríl.

Makríllinn er enn á Breiðafirði. Nokkrir smábátar voru gerðir út til færaveiða í sumar og nú er að minnsta kosti einn eftir, bátur sem Sjávariðjan Rifi hf. gerir út. Báturinn hefur mest verið við Öndverðarnes og suður undir Lóndranga.

„Það var ágætt í gær en í dag er kominn kaldi,“ segir Kristinn Jón og reiknar ekki með miklum árangri í dag. Sjávariðjan gerði út tvo báta á makríl í sumar og Kristinn segist ætla að halda öðrum þeirra til veiða eins lengi og eitthvað fáist. Það vill hann gera til að læra betur á veiðarnar og sjá hvenær makríllinn hverfur. Í fyrra hætti makríll að veiðast í lok ágúst á þessum slóðum.

Skapar verkefni fyrir mannskapinn

„Þetta skapar verkefni fyrir mannskapinn á sumrin, bæði á landi og sjó,“ segir Kristinn Jón. Hann telur nauðsynlegt að vera með eigin vinnslu til að hægt sé að stunda veiðarnar því makríllinn er svo feitur fiskur að hann skemmist ef hann er ekki unninn strax daginn eftir að hann er veiddur.

„Hann er í átu, eins og síldin, og étur alla smásíld sem hann kemst í. Ég er sannfærður um að hann er að hreinsa svæðið upp af síld og drepa allt frá fuglinum,“ segir Kristinn um átuna en tekur fram að lítið hafi fundist af slíku í þeim fiski sem kemur til vinnslu í Sjávariðjunni.

Hluti aflans er flakaður í Sjávariðjunni og hluti er heilfrystur. Ekki er búið að selja allan afla sumarsins. Kristinn Jón reiknar með að nota hluta heilfrysta makrílsins í beitu. Þá séu flökin seld í reyk.

„Þessi fiskur er svo óútreiknanlegur að ekki þýðir að treysta á það. Hann hefur þó verið hér í tvö ár, eða þrjú,“ segir Kristinn Jón um framtíðarhorfur.