Aðeins Noregur og Lúxemborg leggja meira til meira fé með nemendum á grunnskólastigi en Íslendingar. mbl.is/Golli

Ísland er sem fyrr í hópi þeirra landa innan OECD sem verja mestu fé til menntamála þegar á heildina er litið, samkvæmt skýrslu OECD um menntamál, sem birt var í gær.

Tölurnar í samanburði OECD eru frá árunum 2008 og 2009. Ísland er þó einungis meðal efstu þjóða þegar litið er til fjárframlaga á barnaskóla- og unglingastigi. Samanburður á framlögum til háskóla sýnir að Ísland er langt undir meðaltali OECD-landanna.

Ef skoðuð eru útgjöld til menntamála á öllum skólastigum kemur í ljós að OECD-löndin vörðu að meðaltali 9.873 bandaríkjadölum (rúmlega 1.150 þúsund ísl. kr.) á hvern nemanda á árinu 2008 og voru Íslendingar í ellefta sæti.

Útkoman er hins vegar mjög mismunandi eftir skólastigum. Íslendingar lögðu sem samsvarar 10.599 bandaríkjadölum til hvers grunnskólanemanda og eru þar í 3. sæti, næst á eftir Noregi og Lúxemborg. Á framhaldsskólastigi er Ísland hins vegar eftirbátur margra annarra landa. Framlög á hvern nemanda á framhaldsskólastiginu samsvarar rúmlega 9.000 bandaríkjadölum hér á landi, sem skipar Íslandi í 17. sæti.

Í umfjöllun um mál þetta í Morgunblaðinu í dag kemur fram, að á háskólastigi drögumst við enn frekar aftur úr í samanburði OECD, erum í 21 sæti.