Íslensk grasrótarherferð hófst haustið 2008 þar sem Bretum var sagt að Íslendingar væru ekki. mbl.is

Þingmenn Framsóknarflokksins ætla að endurflytja þingsályktunartillögu um málshöfðun á hendur breska ríkinu fyrir alþjóðlegum dómstól vegna beitingar hryðjuverkalaga gegn Landsbankanum haustið 2008.   

Sigmundur Davíð Gunnlaugsson, formaður Framsóknarflokksins, og Gunnar Bragi Sveinsson, þingflokksformaður framsóknarmanna, segjast ætla að leggja tillöguna fram á þinginu, sem hefst 1. október, í ljósi niðurstöðu IFS greiningar, sem gerð var fyrir fjármálaráðuneytið um áhrif hryðjuverkalaganna.

Kemur þar fram að beint tjón íslenskra fyrirtækja hafi verið á bilinu tveir til níu milljarðar króna og líklegasta gildið sé um 5,2 milljarðar. Þá bendi flest bendi til þess að óbeint tjón sé mun hærra og líklegt sé að laskað orðspor íslensks efnahagslífs og þar með íslenskra fyrirtækja hafi haft langmest tjón í för með sér.

Þingflokkur framsóknarmanna lagði ásamt fleiri þingmönnum fram tillögu til þingsályktunar á síðasta þingi um málshöfðun á hendur breska ríkinu fyrir alþjóðlegum dómstól vegna beitingar hryðjuverkalaga. Samkvæmt tillögunni átti í fyrsta lagi að byggja málsóknina  á því að beiting hryðjuverkalaganna hafi verið tilefnislaus, ekki lögum samkvæmt og hafi skaðað íslenskt orðspor og fjárhagslega hagsmuni þjóðarinnar. Í öðru lagi yrði gerð krafa um skaðabætur fyrir það tjón sem ákvörðun breskra stjórnvalda olli íslenska ríkinu og íslenskum fyrirtækjum.

Tillögunni var vísað til utanríkismálanefndar þingsins í febrúar en þaðan var hún aldrei afgreidd. Segja þeir Sigmundur Davíð og Gunnar Bragi, að í ljósi niðurstaðna skýrslu IFS greiningar um mat á áhrifum hryðjuverkalaga sé ljóst að full ástæða hefði verið til að tillagan hlyti afgreiðslu á Alþingi. 

Milljarða tjón vegna hryðjuverkalaga