Vilhjálmur Birgisson, formaður Verkalýðsfélags Akraness. mbl.is/SteinarH

„Ég spyr, hvað eru bandarísk stjórnvöld að skipta sér af hvalveiðum Íslendinga í ljósi þeirra staðreynda að hvalveiðar Íslendinga eru löglegar og alþjóðleg viðskipti með hvalaafurðir eru í samræmi við alþjóðlegar skuldbindingar,“ segir Vilhjálmur Birgisson, formaður Verkalýðsfélags Akraness, á heimasíðu sinni.

Hann gagnrýnir harðlega hvernig „svokallaðar vinaþjóðir“ Íslendinga hafi komið fram við þjóðina á undanförnum árum. Fyrst hafi Bretar beitt hryðjuverkalögum gegn Íslandi sem kostað hafi þjóðina stórfé og mannorðsmissi. Þá hafi bandarísk stjórnvöld nú síðast lýst því yfir að þau ætluðu að beita Ísland diplómatískum þrýstingi vegna hvalveiða Íslendinga.

„Að fá slíka hótun frá stórveldi eins og Bandaríkjamönnum er grafalvarlegt í ljósi þeirra staðreynda að það liggur fyrir að veiðar Íslendinga á hrefnu og langreyðum eru byggðar á löglegum og traustum vísindalegum grunni og það er skylda íslenskra stjórnvalda að mótmæla svona ofbeldi af fullri hörku,“ segir Vilhjálmur.

Pistlinum lýkur hann á áskorun til íslenskra stjórnvalda: „Ég skora á íslensk stjórnvöld að mótmæla harðlega þessum aðgerðum Bandaríkjamanna sem eru eins og áður sagði ógn við velferð og sjálfstæði okkar Íslendinga til að nýta okkar sjávarauðlindir. Hver þarf að eiga óvini þegar hann á svona vini eins og Breta og Bandaríkjamenn?“

Heimasíða Vilhjálms Birgissonar