Mótmælin fóru friðsamlega fram. Mbl.is/Sigurgeir S.

Rúmlega 30 manns taka nú þátt í friðsamlegum mótmælum við bandaríska sendiráðið vegna fyrirhugaðrar aftöku Troys Davis en hundruð þúsunda manna hafa beðið um að lífi hans verði þyrmt. Aftakan á að fara fram í Georgíu í Bandaríkjunum á miðnætti í kvöld að íslenskum tíma.

„Við erum að senda skilaboð og sýna samstöðu með þeim sem eru að mótmæla í Bandaríkjunum,“ segir Jessie Vanderveen lögfræðingur sem er einn mótmælendanna hjá bandaríska sendiráðinu. Troy Davis var árið 1991 fundinn sekur um að hafa myrt lögreglumann tveimur árum áður og segja stuðningsmenn Davis mikinn vafa leika á sekt hans. Sjálfur hefur hann alla tíð lýst yfir sakleysi sínu.

„Sakfelling Davis byggðist eingöngu á framburði sjónarvotta og eru ekki til nein lífsýni sem tengja hann við morðið auk þess sem morðvopnið hefur aldrei fundist,“ segir Vanderveen. „Hann var sakfelldur og dæmdur til dauða vegna vitnisburðar níu sjónarvotta en sjö þeirra hafa dregið vitnisburð sinn til baka eða breytt honum. Eftir að hann var dæmdur hafa fjölmargar rannsóknir sýnt fram á að vitnisburður sjónarvotta geti verið mjög óáreiðanlegur. Sum vitnanna hafa sagt frá því að lögreglan hafi þvingað þau til að undirrita yfirlýsingar þar sem sagði að Troy Davis væri morðinginn og eitt vitnanna kunni ekki að lesa og lét lögreglan hann fá yfirlýsingu sem hann átti að undirrita,“ bætir Vanderveen við.

Meðal þeirra sem hafa beðið um að lífi Davis verði þyrmt eru Jimmy Carter, fyrrverandi Bandaríkjaforseti og fyrrverandi ríkisstjóri í Georgíu, og Benedikt XVI. páfi.