Kortasamráðsmálið er stærsta samkeppnislagabrot sem viðurkennt hefur verið hér á landi. mbl.is/Golli

Jóhannes Ingi Kolbeinsson, framkvæmdastjóri Kortaþjónustunnar, segir að Valitor, Borgun, Greiðsluveitan og eigendur þessara félaga, bankarnir, hafi haft gríðarlegar fjárhæðir af fyrirtækjum og neytendum með ólöglegu samráði.

Öll gögn kortasamráðsmálsins hafa verið birt á vefnum Kortasamrad.is. Í fréttatilkynningu segir að gögnin gefi heildstæða mynd af tilraun keppinauta Kortaþjónustunnar til að reyna að bola fyrirtækinu af markaði, til að koma í veg fyrir samkeppni á íslenska kortamarkaðnum og stuðla þannig að auknum gróða fyrirtækjanna sem fyrir voru á þessum markaði á kostnað fyrirtækja og neytenda í landinu.

Málsgögn kortasamráðsmálsins voru afhent á grundvelli upplýsingalaga og eru því opinber.

„Innkoma Kortaþjónustunnar á kortamarkaðinn hefur verið til hagsbóta fyrir íslensk fyrirtæki og neytendur. Gjöld kortafyrirtækja á kortafærslur hafa í kjölfarið lækkað umtalsvert. Fyrirtækin Valitor, Borgun og Greiðsluveitan börðust hins vegar hatrammlega gegn þeirri samkeppni sem tilkoma Kortaþjónustunnar hafði í för með sér. Þetta er meðal þess sem sjá má í gögnum málsins sem nú eru aðgengileg öllum sem áhuga hafa.“

Að sögn Jóhannesar Inga Kolbeinssonar, framkvæmdastjóra Kortaþjónustunnar, var ákveðið að birta gögn kortasamráðsmálsins til að upplýsa hvernig Valitor, Borgun, Greiðsluveitan og eigendur þessara félaga, bankarnir, höfðu gríðarlegar fjárhæðir af fyrirtækjum og neytendum með ólöglegum hætti. „Kortasamráðsmálið er stærsta samkeppnislagabrot sem viðurkennt hefur verið hér á landi. Fyrirtækin Valitor, Borgun og Greiðsluveitan viðurkenndu að hafa brotið samkeppnislög með langvarandi og víðtæku ólögmætu samráði og misnotkun á markaðsráðandi stöðu og greiddu samtals 735 milljóna króna sekt vegna aðgerða sinna gegn Kortaþjónustunni, fyrirtækjum og neytendum,“ segir Jóhannes Ingi.