Grímsstaðir á Fjöllum.

Kínverski fjárfestirinn Huang Nubo segir í samtali við fréttavefinn China Daily í dag að hann eigi von á því að fá svar frá ríkisstjórn Íslands innan tveggja til þriggja vikna um hvort hann fær heimild til að kaupa Grímsstaði á Fjöllum.

Segir hann í viðtalinu að ef umsókn hans verði hafnað muni hann hætta við frekari fjárfestingar í Norður-Evrópu í framtíðinni þar sem hann hafi engin persónuleg tengsl við önnur ríki í N-Evrópu né heldur þekki hann löggjöf eða menningu annarra ríkja á svæðinu.

Hins vegar, ef íslensk stjórnvöld samþykkja umsókn hans, mun hann nýta eignarhaldsfélag sitt á Íslandi til fjárfestinga í öðrum ríkjum N-Evrópu.

Huang segir að það hafi aldrei hvarflað að sér að kaup sín á Íslandi myndu vekja þá alþjóðlegu athygli sem raunin er. Allt hafi gengið vel á meðan hann var á Íslandi en við komuna til Kína á ný hafi ítrekað verið leitað til fyrirtækis hans um upplýsingar um hvort það sé einkafyrirtæki og hver tengslin við hið opinbera séu.

„Ef fyrirtæki mitt væri með tengsl við stjórnvöld hefði ég ekki selt prentvélar eða dúkkur eftir að ég hætti störfum hjá hinu opinbera,“ segir Huang í viðtali við Chinadaily. „Ef ég væri stjórnmálamaður myndi Forbes ekki setja mig á lista yfir milljarðamæringa því stjórnmálamenn rata aldrei inn á lista þeirra.“

Að sögn Huangs voru það vinir hans á Íslandi sem hvöttu hann til jarðarkaupa þar þar sem landið þyrfti á erlendri fjárfestingu að halda til að hleypa lífi í efnahagslífið. Ef samningurinn yrði að veruleika yrði hann stærsti samningur af þessu tagi á Íslandi í nokkur ár. Hann telur að það taki fyrir fjárfestinguna að skila hagnaði.