Breiðavik. Ómar Óskarsson

Búskapur verður lagður af á jörðinni Breiðavík við Látrabjarg í haust. Ferðaþjónusta hefur verið rekin þar um nokkurt skeið og ábúendur í Breiðavík, Birna Mjöll Atladóttir og Keran St. Ólafsson, hafa í huga að auka við hana og einbeita sér alfarið að þeim rekstri.

„Ferðaþjónustan er að stækka og vaxa og ég sé fleiri möguleika í ferðaþjónustunni heldur en nokkru sinni sauðfénu. Þetta var mikil vinna og kominn tími til að draga saman seglin og við hættum því með sauðfjárbúið hér í haust,“ segir Keran. Hann segir ákvörðunina leggjast vel í þau. „Þetta er engin skyndiákvörðun, við erum búin að hugsa vel og lengi um þetta. En auðvitað verða þetta straumhvörf hjá okkur.“

Nú er ætlunin að lengja þann tíma sem opið er en þau hjónin geta nú einbeitt sér alfarið að ferðaþjónustunni eftir að sauðféð fer. Næsta verkefni er að smala í síðasta sinn og ganga frá búinu. Spurður um ferðasumarið segir Keran það hafa gengið vel þegar það loksins hófst. „Það fór seint af stað hér eins og víðast annars staðar með vorkulda og lítið var um ferðamenn framan af sumri. En júlí og ágúst voru mjög góðir enda hefur veðurfar verið mjög gott.

Breiðavík er vestasta gistihús í Evrópu enda aðeins 12 km frá Látrabjargi sem er vestasta horn álfunnar. Keran segir lungann af ferðamönnum vera erlendan.