Bryndís Björgvinsdóttir tekur við verðlauninum í dag. mbl.is/Sigurgeir

Bryndís Björgvinsdóttir hlaut í dag Íslensku barnabókaverðlaunin 2011 fyrir bók sínaFlugan sem stöðvaði stríðið.

Bókin fjallar um Kolkex, Hermann Súkker og Fluguna sem eru ósköp venjulegar húsflugur. Þær ákveða að flýja að heiman út af nýja rafmagnsflugnaspaðanum og leita uppi munkana góðu í Nepal sem aldrei gera flugu mein. Þá fer af stað atburðarás sem leiðir til þess að stríð hættir og fluga kemst á forsíðu blaðanna.

Flugan sem stöðvaði stríðið var valin úr fjölda handrita sem kepptu um Íslensku barnabókaverðlaunin 2011. Að mati dómnefndar er þetta merkileg saga sem tvinnar saman mikilvægan boðskap og dillandi skemmtilega frásögn. Söguhetjurnar séu óvenjulegar og veiti lesendum nýja sýn á hversdagslega hluti.

Bryndís Björgvinsdóttir var aðeins fimmtán ára gömul þegar hún sendi frá sér sína fyrstu bók með vinkonu sinni, Orðabelg Ormars ofurmennis, en Flugan sem stöðvaði stríðið er önnur bók Bryndísar. Bryndís er þjóðfræðingur að mennt og starfar m.a. við rannsóknarstörf og kennslu.

Verðlaunasjóður íslenskra barnabóka var stofnaður 30. janúar 1985 í tilefni af sjötugsafmæli Ármanns Kr. Einarssonar rithöfundar (1915–1999). Að sjóðnum standa fjölskylda Ármanns, bókaútgáfan Vaka-Helgafell, nú innan vébanda Forlagsins, IBBY á Íslandi og Barnavinafélagið Sumargjöf. Fulltrúar þessara aðila skipa dómnefnd sem velur úr handritum en einnig eru í henni hverju sinni tveir grunnskólanemar, fulltrúar lesenda. Að þessu sinni komu þeir úr Rimaskóla í Reykjavík.