Aðalfundur Útvegsmannafélags Vestfjarða skorar á ríkisstjórnina að draga til baka frumvarp til laga um breytingar á stjórn fiskveiða, sem lagt var fram á Alþingi í vor. Þetta kemur fram í ályktun sem félagið hefur sent frá sér.

„Jafnframt skorar aðalfundurinn á stjórnvöld að hefja nú þegar vinnu við að útfæra tillögur sáttanefndar um samningaleið en hún felur í sér að gerðir verði langtímasamningar við sjávarútvegsfyrirtæki um nýtingu aflaheimilda og að áfram skuli byggt á aflamarki við stjórn fiskveiða.

Í greinargerð sérfræðihóps sjávarútvegs- og landbúnaðarráðherra kemur fram að fyrirhugaðar breytingar muni hafa verulega neikvæð áhrif á rekstur sjávarútvegsfyrirtækja, kjör fiskvinnslufólks og sjómanna. Sömu niðurstöðu er að finna í flestum umsögnum hagsmunaaðila um frumvarpið. Í sumum þeirra er beinlínis varað við því tjóni sem samþykkt frumvarpsins myndi hafa í för með sér.

Við breytingar á lögum um stjórn fiskveiða er nauðsynlegt að missa ekki sjónar á því markmiði að áfram verði rekinn hagkvæmur sjávarútvegur á Íslandi. Það er ein af frumforsendum þess að hægt sé að halda uppi góðum lífskjörum hér á landi. Fyrirliggjandi frumvarp gengur þvert á þau markmið.

Forvígismenn útgerðar og fiskvinnslu á Íslandi hafa án árangurs ítrekað leitað eftir viðræðum við stjórnvöld með það að markmiði að komast að samkomulagi og sátt um breytingar á fiskveiðistjórninni. Það frumvarp, sem nú liggur fyrir, getur ekki orðið grunnur að slíkri sátt,“ segir í tilkynningu frá félaginu.