mbl.is/Þorkell

Neytendastofa hefur gert könnun á þyngd forpakkninga unninna kjötvara og segir ljóst að herða verði eftirlit með forpökkuðum vörum á öllum sviðum markaðarins.

Skoðað var kjúklingaálegg, pylsur og skinka, alls 17 vörutegundir.  Hjá þremur af fjórum íslenskum framleiðslufyrirtækjum, sem ekki nota svonefnt e-merki, voru frávik á raunmagni kjöts í umbúðunum meiri en leyfilegt er. Af 12 vörutegundum sem vigtaðar voru hjá þessum aðilum reyndust 6 vörutegundir eða 50% ekki standast kröfur. 

Undirvigt mældist mest á vörum sem pakkaðar eru hjá Norðlenska matborðinu ehf., bæði í Goða- og Krónupylsum og í brauðskinku en einnig komu upp frávik hjá Sláturfélagi Suðurlands í 10 stk. pylsum og í pylsum frá Kjarnafæði.

Í könnuninni komu einnig fram vörur, sem vógu meira en gefið var upp á umbúðum. Í einu tilfelli reyndust allir pakkar sem vigtaðir voru vera með um 40% meira magni af áleggi en uppgefið var á umbúðunum.  Neytendastofa segir, að samkvæmt reglum um þyngd á forpökkuðum vörum mega pökkunaraðilar hafa innihald þyngra en gefið er upp þannig að neytendur hljóti góðs af en þeir megi ekki hlunnfara neytendur.

Prófaðar voru fimm e-merktar vörutegundir frá þremur framleiðendum. Reyndist þyngd á vörunum miða við uppgefna þyngd á umbúðunum vera innan skekkjumarka samkvæmt reglum um e-merktar forpakkningar. 

Neytendastofa segir þó ljóst, að kanna þurfi betur merkingar á e-merktum vörum, til dæmis varðandi nafn pökkunaraðila sem eigi að koma fram þar sem hann beri ábyrgð á pökkun og merkingum, svo sem um þyngd.

Neytendastofa segir, að á neytendamarkaði sé í sívaxandi mæli seldar forpakkaðar vörur sem ekki eru vegnar í viðurvist neytenda. Ábyrgð á vigt vöru sé hjá framleiðendum en þeim beri að tryggja að varan sé vegin á löggiltri vog og raunverulegt magn sé í samræmi við merkingar á umbúðum.