Störf og þjálfun lögreglumanna í óeirðadeildunum eru hvergi skilgreind í kjarasamningum eða metin til launa.

Gunnar Björnsson, formaður Samninganefndar ríkisins, segir að gerðar hafi verið breytingar á tilhögun gerðardóms í kjaramálum lögreglumanna 2001, og samið um út frá hvaða forsendum gerðardómur ætti að ganga við mat sitt á launaþróun lögreglumanna.

Hvor aðili um sig gæti fengið óháðan aðila til að meta launaþróunina. Var það gert og gögnin lögð fyrir dóminn. Landssamband lögreglumanna hafi hins vegar látið vinna mat á launaþróuninni allt aftur til ársins 2001, sem náði auk þess til starfsstétta sem eru utan BSRB.

Í samkomulaginu um gerðardóminn sé hins vegar eingöngu á því byggt að launasamanburðurinn sé við aðra opinbera starfsmenn og að mati samninganefndar ríkisins átti bara að skoða tímabilið frá upphafi seinasta samnings lögreglumanna þ.e. frá 2009. Fulltrúi fjármálaráðuneytisins lagði fram mat Hagfræðistofnunar á launaþróuninni frá 1. júlí 2009.

Fulltrúi lögreglumanna í þriggja manna gerðardómi greiddi atkvæði gegn niðurstöðunni. Að sögn Gunnars er hefð fyrir því að ef deiluaðilar eru ósammála um tillögu sem formaður dómsins setur fram, þá sitja báðir hjá og niðurstaða oddamannsins gildir. Þar sem fulltrúi lögreglumanna greiddi atkvæði gegn henni hafi fulltrúi ríkisins ekki séð sér annað fært en að greiða atkvæði með tillögu formannsins því að öðrum kosti hefði tillagan fallið á jöfnu og réttaróvissa skapast.